Kopiereg op resepte: Carmen Niehaus

Saam met die bekroonde kosredakteur en smaakmaker, Herman Lensing, bak ons skons en koek en bring hulde aan ons ma’s by wie ons soveel van kosmaak maar ook oor die lewe geleer het. En ons geniet klein glasies van Piekenierskloof se soet Straw Wine, my ma se gunsteling.

KOUE GLÜHWEIN

Hierdie bekende Duitse drankie wat eintlik warm geniet word, smaak heerlik afgekoel saam met ‘n sopie Citrus Chai jenewer van Carmien. Maar die kersie op die koek vir my was die bessie-hibiscus-vonkelrooibosystee waarmee die drankie afgerond word.

Maak 2—3 drankies

Bereiding: 15 min

Kooktyd: 5 min

2 heel naeltjies

 2—3 stukke kassia

Knippie swartpeperkorrels

Paar skyfies lemoen

1 bottel (750 ml) Piekenierskloof Tannat

baie ys 

PER GLAS

1 sopie Carmien Citrus Chai jenewer

Helfte van 1 blikkie (300 ml ) Carmien Berry Hibiscus Sparkling Rooibos Ice Tea

1 Plaas die speserye en die lemoenskyfies in ‘n kastrol en giet die wyn by. Bring tot ‘n stadige prut en laat sowat 5 minute prut. 

2 Skep baie ys in ‘n groot bak en giet die rooiwynmengsel deur ‘n sif by. Laat heeltemal afkoel. 

3 Skink ‘n sopie jenewer in elke glas en voeg van die afgekoelde glüwein by tot die glas so driekwart vol is

4 Voeg laastens van die vonkelrooibosystee by.

SKONS MET GRENADILLA-WORTELKONFYT

Herman was lus vir skons met geklopte room, toe wys ek hom presies hoe my ma my geleer skons bak het. Die eerste kookklas wat ek by haar gehad het. Ek dien grenadilla-wortelkonfyt daarby op, ‘n eerste vir my.

Maak 12 skons

Bereiding: 12 min

Baktyd: sowat 20 min

SKONS

500 ml (2 k) koekmeel

10 ml (2 t) bakpoeier

2,5 ml (½ t) sout

60 ml (¼ k) suiker

80 ml (⅓ k) botter

180 ml (¾ k) volroomjogurt

1 groot eier

10 ml (2 t) vanieljegeursel

VIR VOORSIT

Geklopte room (jy kan volroomjogurt by die room meng om dit minder ryk te maak)

Grenadilla-wortelkonfyt

Voorverhit die oond tot 200°C. Spuit ‘n bakplaat en voer met bakpapier uit.

1 SKONS Sif die meel, bakpoeier en sout drie maal saam. Meng die suiker by.

2 Vryf die botter in tot die mengsel soos fyn broodkrummels lyk.

3 Klits die jogurt eier en vanieljegeursel saam. Voeg by en sny met ‘n mes in tot die mengsel net bymekaar kom, voeg spatsel water by indien nodig.

Moenie te veel meng nie.

4 Druk die deeg sowat 2,5 cm dik plat op ‘n meelbestrooide oppervlak.

5 Druk skons uit met ‘n koekiedrukker, gee die koekiedrukker ‘n draai en pak op die bakplaat.

6 Smeer bokante met bietjie melk (moenie dat die melk oor die kante loop nie).

7 Bak 20—25 minute lank of tot ‘n toetspen skoon uitkom. 

8 Sit louwarm voor met geklopte room en konfyt. 

GRENADILLA-WORTELKONFYT

Die soet wortels van Wildeklawer is net die ding om ‘n heerlike konfyt mee te kook. Grenadilla en suurlemoen is heerlik daarby en ek gebruik van Carmien se Calm rooibostee om die grenadillageur verder aan te vul. Die konfyt is geurig en nie te soet nie.

750 g wortels, skoongeskraap en grof gerasper

180--250 ml (¾--1 k) suiker

6--8 grenadillas, gehalveer

Sap en gerasperde skil van 1 suurlemoen

500 ml (2 k) Carmien Calm rooibostee

1 Plaas die gerasperde wortels in ‘n groot kastrol en voeg die suiker by.

2 Skep die vleis van die grenadillas uit en voeg by asook die suurlemoensap en -skil.

3 Voeg die rooibostee by.

4 Bring tot kookpunt en roer totdat die suiker opgelos is.

5 Laat dan prut totdat die konfyt in vlokkies van die lepel val en nie meer loperig is nie.

6 Sit voor saam met die skons.

BEET-EN-UIE-SOUTTERT

Ons het nou wel nie hierdie souttert op televisie gedemonstreer nie, maar ek voel tog dat dit net so lekker by hierdie teeparty inpas as soutigheid. Dis ook ‘n tipiese lae koolhidraattert met ‘n klapperkors wat verspotmaklik is om te maak. Wildeklawer se soet uie en beet is die ideale vulsel.

Genoeg vir 6 mense

Bereiding: 30 min

Gaarmaak: sowat 60 min

KLAPPERKORS

125 ml (½ k) klappermeel

15 ml (1 e) psylliumvesel

5 ml (1 t) bakpoeier

2,5 ml (1 e) sout

90 ml (6 e) olyfolie

125 ml (½ k) kookwater

VULSEL

2 uie, geskil en in ringe gesny (kan rooi uie ook wees)_

olie

30 ml (2 e) bruinsuiker

30 ml (2 e) appelasyn 

500 g gaar beet, geskil en in skywe gesny

125 ml (½ k) Amasi of romerige maaskaas

125 ml (½ k) volroommelk

4 eiers

Sout en peper

2 wiele feta-kaas

paar takkies tiemie

Voorverhit die oond tot 200°C. Spuit ‘n medium losboom-tertpan met kossproei.

1 KORS Meng die klappermeel, psylliumvesel, bakpoeier en sout saam in ‘n mengbak. Meng die olie en kookwater, voeg by die meelmengsel en meng tot ‘n stywe deeg. Jy kan alles in ‘n fles skep, dit toedraai en skud tot gemeng

2 Rol die deeg in ‘n rol, sny in skyfies, pak die skyfies in die tertpan en druk vas met jou vingerpunte tot die hele pan uitgevoer is. Sny die kante netjies. Verkoel so 10 minute.

3 Plaas ‘n kleiner tertpan binne-in die kors en bak sowat 10 minute tot die kors net gaar is, nie bruin nie.

1 VULSEL  Verhit bietjie olie in ‘n pan en braai die uie tot sag, sprinkel die suiker oor en braai tot gekarameliseer, sprinkel die asyn oor en geur met sout en peper.

2 Klits die amasi of maaskaas, melk en eiers saam, geur met sout en peper. 

3 Sprinkel die ui in die gaar kors, pak die beet bo-op en giet die jogurtmengsel oor.

4 Sprinkel die feta-kaas en tiemietakkies oor en bak sowat 40 minute lank of totdat die vulsel gestol is.

OUMA CARMEN SE VEERKOEK 

Hierdie was my ma se standaard koekresep, ‘n Familie-resep afkomstig van my ma se ma en my ouma Carmen. Die koek het gepronk by vele geleenthede. Deesdae laat trek ek ‘n vanielje-rooibosteesakkie in die melk waarmee die koek gebak word. Vir hierdie pronkstuk bak ek vier koeklae wat ek dan met ‘n rooibostee-vla aanmekaar sit. Eenvoudig, maar heerlik geurig en mooi.

Maak 1 vierlaag-veerkoek

Bereiding: 40 min

Baktyd: 20 min

250 ml (1 c) melk 

4 Carmien Creamy Vanilla rooibosteesakkies 

90 g botter 

6 ekstragroot eiers 

500 ml (2 k) strooisuiker 

750 ml (3 k) koekmeel 

3 ml (ruim ½ t) sout 

15 ml (1 e) bakpoeier 

VULSEL

500 ml (2 k) melk

4 sakkies Citrus Chai-rooibostee

4 eiers

100 ml suiker

20 ml (4 t) koekmeel

30 ml (2 e) mielieblom

15 ml (1 e) vlapoeier

Knippie sout

15 ml (1 t) gelatien, gespons in bietjie water

VERSIERSEL 

Geroomde maaskaas waarby bietjie versiersuiker gevoeg is 

Voorverhit die oond tot 200 °C. Voer slegs die bodems van 4 losboomkoekpanne, 20 cm in deursnee uit, spuit met kossproei en stuif met meel. 

1 KOEK Verhit die melk en teesakkies saam tot melk net onder kookpunt is. Laat afkoel en laat trek die teesakkies ‘n paar minute in die melk. Druk die vloeistof goed uit die teesakkies en verwyder die sakkies. Voeg die botter by en roer tot die botter gesmelt is.

2 Klits die eiers tot lig, voeg die suiker lepel vir lepel by en klits goed tot al die suiker opgelos is. 

3 Sif die meel, sout en bakpoeier drie maal saam en vou liggies by die eiermengsel in. Voeg die melkmengsel by en klits goed. 

4 Verdeel tussen die panne en bak sowat 20 minutes of totdat ‘n toetspen skoon uit die koek uitkom. 

5 Laat die koeke in die panne afkoel en keer dan uit op ‘n draadrak. Sny die bokante van die koeklae gelyk indien nodig. 

6 VULSEL Plaas die teesakkies in die melk en verhit tot net onder kookpunt. Klits die eiers en suiker saam tot lig, voeg die melk by, sif die meel, mielieblom en vlapoeier oor en meng goed. Verhit terwyl geroer word tot die mengsel kook en verdik. Laat effe afkoel. Meng die gesponsde gelatien met die melktertmengsel en laat afkoel tot dit net-net wil begin stol. Skep in ‘n spuitsak.   

7 Spuit ‘n spiraal vulsel oor een koeklaag en plaas ‘n volgende koeklaag bo-op. Herhaal met die koeklae en vulsel, buiten op heel boonste koeklaag. Druk die lae goed opmekaar vas.

8 VERSIERSEL Spuit dotjies van die maaskaasmengsel op die boonste laag. Krummel bietjie van die afgesnyde koek bo-oor. Plaas in die yskas tot die vulsel goed gestol is. 

Vir verdere informasie oor voedingswaardes, gesonder eet en resepte, raadpleeg Lekker&Goed, heerlike kos propvol heilsaamheid deur Carmen Niehaus, uitgegee deur LAPA.