Kopiereg op resepte: Carmen Niehaus
Welbekende sanger, Andriette Norman wat ook deesdae spesialiseer in “gut” gesondheid kuier by my. Ek maak vir haar ‘n vleislose heeldag-ontbyt met dahl saam met geposjeerde eier en ‘n hawermoutsaadbrood. Om mee af te skop, drink ons verfrissende varsgepersde groentesap saam met ‘n sopie jenewer vir ‘n bietjie skop.
GROENTESAP MET ROOIBOS EN JENEWER
Die heerlike soet groente van Wildeklawer is ideaal om te gebruik wanneer jy groentesap wil pers. Soos wat Andriette opmerk, hoe nader aan die aarde en hoe verder van ‘n fabriek jy eet, hoe beter. Carmien se Gut-rooibostee bevat buiten ‘n hittebestande probiotika ook sigoreiwortel-vesel wat weer ‘n prebiotika is en beide help vir beter ingewande gesondheid.
250 ml (1 k) varsgepersde wortelsap
125 ml (½ k) varsgepersde beetsap
125 ml (½ k) vars uitgedrukte lemoensap
125 ml (½ k) Carmien Gut-rooibostee (met probiotika), gemaak met 2 sakkies en afgekoel
Sowat 30 ml (2 e) varsgepersde gemmerwortelsap
Paar skyfies vars komkommer
Sowat 2 sopies (50 ml elk) Carmien Floral jenewer
Skyfies vars suurlemoensap
ys
1 Meng al die sappe saam in ‘n beker en voeg die afgekoelde rooibostee by.
2 Plaas ‘n paar skyfies komkommer in 2 glase en giet die sopies jenewer by.
3 Skink die sap in die glas en voeg ‘n paar skyfies suurlemoen by. Rond af met lekker baie ys.
DAHL MET GEPOSJEERDE EIER
Hierdie geurige dahl is heerlik vir ontbyt saam met ‘n geposjeerde eier. Piekenierskloof se vlagskipwyn, granache noir, bevat minder tanniene, en is dus nie so swaar nie en daarom ‘n goeie kosvriend en die ideale rooi wyn om by ‘n laatontbyt te geniet.
Genoeg vir sowat 3 mense (afhangend van hoe honger jy is)
Bereiding: 20 min
Gaarmaak: 30--40 min
2 uie, gekap
3—4 knoffelhuisies, fyngekap
15 ml (1 e) vars gemmer, fyngerasper
1 brandrissie, ontpit en gekap (opsioneel)
olie
15 ml (1 e) brejani-masala of geroosterde masala of medium kerriepoeier
2,5ml (½t) borrie
2,5 ml (½ t) paprika
10 ml (2 t) fyn komyn
1 blik (400 g) tamaties in sap ingemaak
500 ml (2 k) rooi lensies, vir ‘n halfuur geweek in 1 liter (4 k) water
500—750 ml (2—3 k) roibosteeaftreksel, gemaak met 6 sakkies Carmien Focus (met geurige speserye en borrie)
Sout en peper na smaak
Strooisel suiker
Lemmetjiesap
Groot handvol gekapte koljanderblare
VOORSIT
skeppie natuurlike jogurt
geposjeerde eier
Hawermoutsaa brood of geroosterde suurdeegbrood
1 Braai die ui en knoffel saam met die gemmer en brandrissie in bietjie olie tot sag. Roer die speserye by en roerbraai tot geurig, so 5 minute, pas op vir brand.
2 Voeg die tamaties by en bring tot kookpunt.
3 Dreineer die lensies en voeg saam met die aftreksel by. Bring weer tot kookpunt en laat prut tot die lensies sag en eintlik tot ‘n moes gekook is.
4 Geur na smaak met sout en peper asook bietjie suiker en lemmetjiesap en ‘n goeie handvol koljander. Laat prut tot geurig, weer so 5 minute.
5 Skep in borde op en sit voor met ‘n geposjeerde eier indien verkies en ‘n sny suurdeegbrood of poppadum.
Hoe om die eier te posjeer: Giet 2—3 cm water in ‘n pot en bring tot ‘n stadige prut. Voeg 45 ml (3 e) witasyn by. Breek die eiers een vir een in die water en posjeer 2—3 minute vir sagte eiers. Skep die eiers uit die water met ‘n gaatjieslepel en dompel in yswater. Sit voor saam met die dahl en brood.
HAWERMOUT-SAADBROOD
Hierdie lieflike hawermoutbrood bevat heelwat sade wat buiten vesel ook goeie vette bevat en help om die koolhidraatlading te verminder. Die eiers sorg vir proteïen en die Carmien Gut-rooibostee verskaf pre- en probiotika wat ingewande gesondheid ondersteun.
Maak 1 medium brood
Bereiding: 15 min
Baktyd: 40—50 minute
625 ml (21/2 k) hawermout, verkieslik glutenvry
250 ml (1 k) gemengde sade, insluitend sonneblom-, pampoen-, sesam- en lynsaad
60 ml (1/4 k) psylliumvesels
12,5 ml (2½ t) bakpoeier
5 ml (1 t) sout
4 eiers
45 ml (3 e) klapperolie, gesmelt
250 ml (1 k) Carmien Gut rooibos met probiotics (gemaak met 2 sakkies)
15 ml ( 1 e) appelasyn
gemengde sade of sesamsade vir bo-op sprinkel
Voorverhit die oond tot 180°C. Spuit ‘n klein broodpannetjie en voer die bodem uit met bakpapier. Spuit weer.
1 Meng die droë bestanddele goed saam.
2 Klits eiers, voeg klapperolie, water en appelasyn by en klits goed.
3 Voeg by die droë bestanddele en meng goed. Laat staan 10 min tot stewig.
4 Skep in pannetjie, druk effe plat en sprinkel nog bietjie sade bo-oor.
Bak sowat 40--50 minute of tot ‘n toetspen skoon uitkom. Sit voor met die dahl.
In lugbraaier: Stel die lugbraaier op bak en verhit tot 180°C. Bak 30 minute lank, bedek die brood na 15 minute met tinfoelie om te keer dat dit te donker bak bo-op.
Vir verdere informasie oor voedingswaardes, gesonder eet en resepte, raadpleeg Lekker&Goed, heerlike kos propvol heilsaamheid deur Carmen Niehaus, uitgegee deur LAPA.