Betrokkenes en familielede kry die kans om hulle ongelooflike wedervaringe te deel. Hul naastes en kenners werp verdere lig op die stories.
In die nuwe seisoen van 14 episodes, wat deur Pop24 vervaardig is, gaan kykers verstom word deur inspirerende lewensverhale van dwarsoor die land.
Verskeie van die episodes gaan oor mediese wonders, seldsame siektetoestande en dapper mense wat skynbaar onoorbrugbare hindernisse oorkom het. Merenthia Cronjé van Secunda was na ’n foefieslaaid-ongeluk ’n parapleeg, maar nou is daar hoop dat sy weer sal kan loop. Die verlamde Joseph Damonse het weer leer loop na ’n verskriklike motorongeluk en liefde gevind by Denielle wat tydens ’n rooftog in die gesig geskiet is, maar tog ma geword het.
Ander stories van verbete vegters sluit in dié van Raémondo Lessing, wie se ledemate geamputeer is en nogtans ’n branderplankryer geword het; Cobus “Die Viking” Visser wat Kilimandjaro met krukke aangedurf het en oor kole kan loop; Patrick Botto wat na ’n reeks fratsongelukke aan ’n rolstoel gekluister is, maar geleer het om met sy mond te skilder en veerpyltjies te speel; die blinde Cornelle Leach wat met behulp van weldoeners en skarebefondsing ’n duur operasie in Duitsland ondergaan het om haar man uiteindelik te kan sien; Adri Henn wat ’n elektriese skok van 88 000 volt wonderbaarlik oorleef het, en Megan Krüger wat op 18 maande byna deur ’n tier in ’n natuurreservaat verskeur is en 18 jaar later die lewe omhels. Daar is ook die verhaal van Adele Vrey wat 20 jaar gelede ’n satanis was en gestuur is om ’n bekende pastoor te vermoor maar tot inkeer gekom het.
Die seisoen eindig met Timothy Kieswetter – ’n pastoor wat later ’n seksterapeut en komediant en een van die grootste seksspeelgoedinvoerders in die land geword het.
“Dié reeks,” sê die kreatiewe vervaardiger Loren Greyling, “vier mense se veerkragtigheid, hul geloof en veggees. Dis die stories van mense wat ten spyte van ondenkbare trauma en swaar terugslae, bo hul omstandighede uitgestyg het, positief gebly het en aanhou lewe het – vir hulself, hul gesinne en hul kinders.”
- Die nuwe seisoen van Vreemder as fiksie begin op 7 April om 20:00 op kykNET (DStv-kanaal 144) en sal ook op DStv Stream en Catch Up beskikbaar wees.