Andries Hendrik Potgieter en Wiaan Fourie van die Toerbroers-reisagentskap het ’n nuwe projek, en kykNET-kykers kan deel in dié interessante nuwe veer in hulle hoed.

Andries en Wiaan, ook bekend as die lede van die sanggroep DZL, het besef daar is jong mense wat matriek geskryf het en hul in die toerismebedryf wil uitlewe, maar nie altyd by die regte plek aanklop om ’n toekoms te verseker nie.

In Toerbroers: Jou Toekoms, wat van 3 April om 17:30 op kykNET (DStv-kanaal 144) te sien sal wees, neem Andries en Wiaan aanvanklik 45 studente, wat joggies genoem word, onder hande en wys hulle hoe ’n beroep in natuurbewaring en toerisme lyk. Hierdie groep word vinnig afgewerk na 25, 15 en ’n toptien, en daarna word iemand elke episode uitgestem. Al 45 kan egter steeds gesien word gedurende die reeks – selfs dié wat uitgeval het.

Die joggies woon permanent op die Toerbroers-kampus waar hulle, onder meer, kursusse bywoon, take uitvoer en, meer belangrik, ook praktiese ondervinding opdoen wat deel van hulle persoonlike onwikkeling vorm. Gedurende die 13 episodes kry die joggies ’n kykie na dit wat hulle deur die loop van hulle twaalf maande lange geakkrediteerde toerismekursus gaan leer en ervaar. Deur Toerbroers-kursusse kan jong natuurliefhebbers ’n verskeidenheid NQF Vlak Vier- en NQF Vlak Vyf-sertifikate wat deur CATHSSETA, AgriSETA en SAQA geakkrediteer is, verwerf. Elke week word daar ook ’n uitdaging gestel waarna die top drie joggies aangewys word wat met werks- en opleidingsgeleenthede by Toerbroers en hulle vennote beloon word. Die uiteindelike top drie stap met fantastiese pryse en groot geleenthede weg.

Die joggies kry punte vir hulle take, en volgens die vervaardigers kan kykers hulle gereedmaak vir ’n hele klomp verrassings, kinkels en intriges. Die reeks word deur Toerbroers, tans die grootste Afrikaanse reisagentskap in die wêreld, geborg, en kykers sien hoe Andries en Wiaan elke week opvoedkundige instellings, diere-organisasies en reisbestemmings saam met gaste besoek, en leer só ook die joggies ken.

“Dit is in mense se natuur om ’n verskil te wil maak, maar nie almal weet waar om te begin nie,” sê Andries. “Ons bring vir die joggies geleenthede wat hulle lewens kan verander, en dit terwyl ons kykers vermaak en self sodoende ’n verskil maak. Toerisme is een van die grooste drywers van ekonomiese groei in die land, en wanneer die joggies hier uitstap, kan hulle enige plek in Suid-Afrika en op verskeie plekke buite ons grense gaan werk. Ons gee hulle ’n toekoms.”

“Ons land is propvol mense met verskillende passies en behoeftes,” sê Wiaan. “Duisende mense toer reeds elke jaar saam met Toerbroers, en duisende mense is op soek na geleenthede om ’n verskil te maak. Toerbroers: Jou toekoms het al daardie elemente. Ons hoop om ook nuwe jongmense te inspireer wat in 2026 by ons toerismeprogram wil aansluit om hulle passie uit te leef.”

Toerbroers: Jou toekoms begin op Donderdag 3 April om 17:30 op kykNET (DStv-kanaal 144) en sal ook op DStv Stream beskikbaar wees.