Rian praat weer reguit met mense wat die land aan die gons het – van hulle omdat hulle deur diep waters gaan, ander omdat hulle sterk standpunt oor ’n saak inneem.

“Die nuwe seisoen belowe natuurlik nog interessante bekendes en nuusmakers, sowel as hulle verrassingsgaste,” sê Rian. “Kykers kan ook hier en daar mense verwag wat nie ’n wag voor hulle mond het nie en vir vurige debat sorg.”

Van die gaste wat saam met hom om ’n tafel gaan kuier, is die sanger Heinz Winckler en sy vrou, Aletté, wat in die nuus was omdat daar teenkanting teen hulle boekbekendstelling was; die veteraanradio-aanbieder Darren Scott wat deur ’n gesondheidskrisis gaan, maar weier om te gaan lê; die TikTok-ster Terrible Tess en die sanger en liedjieskrywer Jan Blohm, wat deur sy loopbaan verskeie oppe en affe gehad het.

Die aktrise en komediant Marion Holm, die akteur en aanbieder Soli Philander, en die entrepreneur Vusi Thembekwayo asook Ernst Roets, wat ná 20 jaar uit die Solidariteit-beweging bedank het. Die vervaardiger van Laataand by Rian is Provoco-produksies.

“Ons hou die media dop om te sien wie mense aan die praat het, en dan is dit meet en pas om seker te maak dat ons die aanbod vir ons kykers so interessant as moontlik hou,” sê Rian.

Wie is sy ideale gas?

“Altyd iemand wat nie skroom om by sy of haar standpunt te bly nie, ten spyte van wat die openbare opinie oor hulle mag wees.”

Die vierde seisoen van Laataand by Rian begin op Dinsdag 8 April om 21:00 op kykNET (DStv-kanaal 144) en sal ook op DStv Stream en Catch Up beskikbaar wees.