Die Byl
4 Maart
Die span besef dat die reeksmoordenaar slagoffers deur vermommings mislei. Lena help met die Danté-moorde. Tarina is al meer in Juan se omtrek, wat sy huwelik onder druk plaas.
11 Maart
Byl besef dat die moordenaar na hom uitreik wanneer sy persoonlike inligting met hom deel. Nicki help om ’n moontlike blyplek vir Eliaan op te spoor, maar ’n gewapende vrou wag Byl in.
18 Maart
Die span vind uit wat regtig gebeur het toe die Slees se huis afgebrand het. Byl besef hoe sinister Arbortech is. Hy neem die waaghalsige besluit om Aletta Slee as lokaas te gebruik.
Die Byl is Dinsdae om 20:00 op kykNET (DStv-kanaal 144) en is ook op DStv Stream en Catch Up beskikbaar.
Niggies
Van die bekendste name in teater, film en TV in Suid-Afrika is deel van die rolverdeling van Niggies, die nuwe dramareeks wat op 25 Maart op kykNET (DStv-kanaal 144) begin.
Niggies is gegrond op ware gebeurtenisse en vertel die verhaal van die twee twaalfjarige niggies, Issie Fourie en Petro Nel, wat in 1965 in die rustige dorpie Odendaalsrus in die Vrystaat ontvoer en vermoor is. Issie se broer, André, sweer daarna om alles in die stryd te werp om die skuldige aan die pen te laat ry, maar dit sou hom byna 20 jaar kos. Niggies begin dus in 1965, maar die reeks strek oor die 1960’s en 1980’s.
Beer Adriaanse, bekend vir flieks soos Wonderlus en Kanarie, asook reekse soos Hotel en Taktiek, vertolk die rol van die ouer André. Die talentvolle nuweling Janru Steenkamp speel die jong André.
Carel Nel (Koek, Spinners) is kaptein At van Wyk wat die ondersoek lei. Tinarie van Wyk Loots (Dwaalster, Fynskrif) en Jacques Bessenger (Koek, Een keer om die son) speel Issie (Lane Vertue) se ouers, Marie en Dries Fourie.
Neels Clasen (Getroud met rugby, Legacy) en Erica Wessels (Dwaalster, Donkerbos) is Petro (Izebella Louw) se ouers, Henning en Ousus. Petro se ouer suster, Henda, word as 17-jarige deur Anja Taljaard (Juffrou X, Een keer om die son) vertolk en as 35-jarige deur Cintaine Schutte (Dinge van ’n kind, Fynskrif).
Albert Pretorius (Donkerbos, Nêrens, Noord-Kaap,) en Roeline Daneel (Fynskrif, Diepe waters) is Gustaff en Maks Fouché – naby familie van die slagoffers.
Ander spelers sluit in Jana Kruger, Liam Bosman, Wessel Pretorius, Daneel van der Walt, Stian Bam, Ludwig Binge, Mbulelo Grootboom, Neels van Jaarsveld, Melissa Myburgh, Deon Lotz en Michele Burgers.
Die regisseur is die veelbekroonde Jaco Bouwer, wat nie net bekend is vir sy grensverskuiwende teaterwerk nie, maar ook vir die internasionale trefferreeks Spinners, wat in en om Kaapstad verfilm is. Niggies is vervaardig deur Wolflight Films, met Roelof Storm (Kanarie, Poppie Nongena) as uitvoerende vervaardiger. Die bekroonde Saartjie Botha en Philip Rademeyer het die draaiboek geskryf.
In die eerste episode is dit ’n doodgewone dag in Januarie 1965 op Odendaalsrus in die Vrystaat. Twee niggies, Petro en Issie, gaan na die munisipale swembad, maar verdwyn dan spoorloos.
Niggies begin op 25 Maart om 20:00 op kykNET (DStv-kanaal 144) en sal ook op DStv Stream en Catch Up beskikbaar wees.
Kokkedoor: Vuur & vlam
Die bekroonde sjef Bertus Basson en braaighoeroe Kobus Botha moet die braaiers weeg, en dié wat te lig gevind word, huis toe stuur.
6 Maart
Met ’n vleissaag in die hand en ’n springbok in die koelkamer gaan dinge maar wild. Vuursjef Shaun Scrooby vra elegante vyfster-safarikos uit die voorkwart én die agterkwart of dis bokveld toe.
13 Maart
Die braaiers moet ’n romantiese ete voorberei wat enige opsitkers sal laat opvlam. Die spens is vol verleidelike bestanddele, maar sjokolade op die rooster laat dalk die spanne se liefdesbootjie kantel.
20 Maart
Enjingedreun en sissende spek verklap dat honger bikers stop vir ontbyt. Die spanne skarrel met die taco’s, wafels en jaffels, want die gaste is haastig om weer op die oop pad te kom.
27 Maart
Die Kokkedore ruil braaitange vir mengbakke en kyk hul vrees in die oë om outydse melktert op die vuur te maak. Die kersie op die koek is dat Kokkedoor Theresa de Vries kom kuier.
Kokkedoor: Vuur & vlam is op Donderdae om 20:00 op kykNET (DStv-kanaal 144) en is ook op DStv Stream en Catch Up beskikbaar.
Lamb Champs: Die hart en siel van skaapboerdery
In Lamb Champs: Die hart en siel van skaapboerdery, ’n nuwe dokumentêre reeks wat op 16 Maart om 20:00 op kykNET (DStv-kanaal 144) begin, reis Minki van der Westhuizen die land vol om die verhaal van ses skaapboere te vertel. Dié reeks van ses episodes stap saam met die boere die pad na die Lamb Champs-kompetisie, wat in 2024 in Pretoria aangebied is en waar die topskaapboer met R80 000 se pryse weggestap het.
Die Lamb Champs-kompetisie is deur Saai (Suider-Afrika Agri Inisiatief) begin omdat hulle Suid-Afrika se skaapvleis op die wêreldkaart wil sit.
“Ons braai lamsvleis as ons spesiale mense om ons het,” sê Francois Rossouw, uitvoerende hoof van Saai. “Dit is ’n ete wat méér beteken. Dit is die geur van herinneringe, van saamwees, van familie. Dit is daardie oomblik wanneer ’n gesin om die vuur bymekaarkom, wanneer vriende saamlag terwyl die kole gloei. Skaap is nie net vleis nie – dit is ’n baken van tradisie.”
Lamb Champs: Die hart en siel van skaapboerdery volg ses skaapboere – van hulle is reeds geslagte lank op ’n familieplaas, maar van die ander is die eerste generasie wat grond gekoop en met skaap begin boer het. Die boere se agtergrond mag verskil, maar hulle het twee dinge gemeen: trots en passie.
“Hierdie is nie net ’n landboureeks nie – dit is ’n storie van familie, tradisie en erfenis. Dis ’n uitnodiging aan verbruikers om te sien waar hul vleis regtig vandaan kom, om weer ’n persoonlike verbintenis met kos te hê, en om die ware waarde van familieboerdery te verstaan,” sê Saai in ’n mediaverklaring.
Met sielvolle onderhoude, humor en menslikheid, en kinematografie wat jou asem wegslaan, is Lamb Champs: Die hart en siel van skaapboerdery ’n reeks wat oor veel meer as net skaapboerdery gaan. Ja, dit neem die kyker na daar waar die skaapvleis sy reis na die uiteindelike winkelrak begin, maar dit vertel ook van uithou en aanhou en van boere en die mense in hulle lewens wat altyd ’n plan maak.
Die Lamb Champs-kompetisie word deur Pick n Pay en Toyota geborg.
“Ons is diep dankbaar vir ons vennote, Pick n Pay en Toyota, wat saam met ons help bou aan ’n wêreld waar familieboere nie net oorleef nie, maar floreer,” sê Francois. “Pick n Pay het meer gedoen as om net ’n borg te wees – hulle het rakspasie geskep, hul kopers betrek en ’n belofte gemaak om die afstand tussen boer en verbruiker kleiner te maak.”
Lamb Champs: Die hart en siel van skaapboerdery begin op 16 Maart om 20:00 op kykNET (DStv-kanaal 144) en sal op DStv Stream en Catch Up beskikbaar wees.
Afrikaans is Groot 2024
Afrikaanse musieksterre soos Bok van Blerk, Riana Nel, Appel, Jay, Karlien van Jaarsveld, Corlea Botha, Early B en Francois van Coke, het by verlede jaar se Afrikaans is Groot weer ’n volgepakte SunBet Arena in Pretoria onder begeleiding van ’n vuurwarm orkes laat dreun. Die seremoniemeesters was Minki van der Westhuizen en Hammie Wessels.
Afrikaans is Groot word op 8 Maart om 20:00 op kykNET (DStv-kanaal 144) uitgesaai.
Fliektyd
#LoveMySelfie
Die TV-ster Adele Swan se verloofde verkul haar en laat haar finansieel in die knyp. Sy kry ’n geleentheid om haar skuld te delg deur in te stem om die gesig van eiendomsmagnaat George se veldtog te word. Hy wil met ’n kompetisie op die luukse plesierboot MSC Sinfonia eksklusiewe eenhede van die Silwer Eike-aftreelandgoed bemark. Deur hul beste selfie in te stuur, wen twaalf gelukkige seniors ’n naweek op dié plesierboot saam met Adele. Die vroue ding mee in uitdagende speletjies om die eksklusiewe prys van ’n aftree-eenheid, ter waarde van R7 miljoen, te wen.
Illse Roos is te sien as Adele, en die res van die rolverdeling sluit in June van Merch, Joanie Combrink, Robyn Scott, Hélène Truter, Chanelle de Jager en Kevin Smith as die slinkse George. Kurt Darren maak ook ’n verskyning. Die regisseur is Lika Berning.
#LoveMySelfie is op 15 Maart om 20:00 op kykNET (DStv-kanaal 144).
Sepies
Binnelanders
Weeksdae om 19:30 op kykNET (DStv-kanaal 144)
Conrad let op dat Imke vreemd optree en waarskynlik jok oor wie sy regtig is, en dan besef Nicolette sy ken haar van iewers af. Daar is ’n ontploffing in Pretoria. Ongevalle raak nog meer oorweldig, en Uys begin dit ernstig oorweeg om pa te word.
Mercia trek Eikehof toe. Kristien deel nuus waarvan Delia glad nie hou nie, en Delia is woedend vir Lukas wanneer die volle waarheid oor Imke uitkom – haar regte naam is eintlik Desiré. LJ doen iets wat hy nie moet nie, en Thalia se hart is gebreek. Anya daag by Binneland op, en Max word heeltemal onkant betrap wanneer hy uitvind sy werk vir hom.
Suidooster
Weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145)
Kaashifa is uit die hospitaal, maar dinge is nie meer dieselfde nie en sy gaan nie oornag net na die lewe kan terugkeer soos voor die insident nie. Die toekoms lyk dus baie donker vir haar, en boonop kan Rhafiek nie net vergewe en vergeet nie.
Nazeem wil Carlo help om sy leerderslisensie op ’n slinkse manier te verkry, maar Carlo kies die eerlike pad. Tog begin Nazeem se invloed op Carlo al hoe groter raak en is Carlo nogal in sy noppies met die sukses van sy en Nazeem se plannetjies. Dit voorspel egter net moeilikheid, en dan gebeur iets skokkends.
Justin en Gary mag dalk die strydbyl oor die app begrawe het, maar die nuwe vennootskap is nie maanskyn en rose nie.
Daar is ’n nuwe gesig in Ruiterbosch. Frankie daag in Ruiterbosch op, en sy is hier om wortel te skiet en begin by Oos Wes as ’n kelnerin werk. Dié aantreklike blondine trek dadelik die aandag.
Diepe waters
Maandae tot Donderdae om 18:30 op kykNET (DStv-kanaal 144)
Gys en Zelda se verhouding bereik ’n hoogtepunt met hul troue, maar nie alles verloop soos beplan nie – ’n ongenooide gas daag op. Intussen bevind Karla, Lucas en Juvan hulself in ’n driehoek waar gevoelens en vriendskap teen mekaar opgeweeg moet word.
Zelda ervaar ’n onrustige tyd wanneer sy met veragting gebombardeer word. Intussen het Gys sy eie uitdagings, veral met Lucas wat op soek is na ’n sterk vaderfiguur. Sal Gys die leiding neem of sal ’n ander invloed Lucas se lewe vorm?
’n Nuwe gesin verskyn in Boskruin, en ’n posisie by Skinvestment wek belangstelling. Intussen bring die Swart Marlyne se familie-soirée verrassings, en sekere bande word sterker terwyl ander onder druk kraak.
kykNET&kie
Skemergrond
Maandae tot Donderdae om 19:30 op kykNET&kie (DStv-kanaal 145)
Manny en Tillie se vriendskap floreer steeds, maar terwyl hy gereed is vir die volgende stap, raak Ronnie al hoe meer bekommerd oor sy gesondheid. Ruan kom op ’n jong meisie af wat in haar kar slaap, maar sy maak haarself sommer baie gou tuis in Gemoedsdrif. Erica is soos gewoonlik baie agterdogtig oor enige nuwelinge, maar Kirby wen stadig maar seker haar vertroue.
Dinge raak te warm vir die Cloetes, en al staan die gemeenskap bankvas agter hulle, besluit hulle om Gemoedsdrif te verlaat. Maar nie sonder een laaste danskonsert nie. Dis net ’n jammerte dat die danskonsert onderbreek word deur ’n onverwagte gas. Almal is gereed vir Beeno en Gloria se troue, maar daar is chaos op Everlasting wanneer planne skeefloop.
Plaas van passie
Op 18 Maart begin kykNET&kie eksotiese nuwe terrein verken met ’n telenovela vol drama en stomende hartstog uit die trope van Brasilië – Plaas van passie. Die oorspronklike Portugese titel is Terra e Paixão (Land of Desire in Engels). kykNET&kie word hiermee die eerste plaaslike kanaal wat ’n Brasiliaanse telenovela in Afrikaans oorklank.
Plaas van passie vertel die verhaal van Aline (Barbara Reis), ’n wiskundeonderwyseres, wie se man, Samuel (Ítalo Martins), op hulle plaas vermoor word omdat booswigte sy grond wil hê. Al het sy geen ondervinding met boerdery nie, besluit Aline – met behulp van haar getroue vriend Jonatas (Paulo Lessa) en met ondersteuning van haar ma, Jussara (Tatiana Tibúrcio) – om alles te doen om die plaas vir haar en haar seun, João (Matheus Assis), te behou. Haar grootste teenstand kom van die grondbaron Antônio La Selva (Tony Ramos), die man wat vir Samuel se dood verantwoordelik was.
Maar daar is ook ingewikkelde liefde in die lug wanneer haar pad met Daniel (Johnny Massaro), Antônio se een seun, kruis. Dinge raak moeilik wanneer Caio (Cauã Reymond), Daniel se halfbroer wat soos dag en nag van hom verskil, ook vir Aline in sy visier kry. Caio se ma, Agatha (Graça Junqueira), is dood met sy geboorte, en Antônio het hom nog nooit daarvoor vergewe nie.
Irene (Glória Pires), Antonio se vrou en Daniel en Petra (Débora Ozório) se ma, asook Caio se stiefma, is magsbehep en sal enigiets doen om te sorg dat net Daniel en Petra die familiebesigheid oorneem.
Die spelers wat vir die Afrikaanse stemme sorg, is Claudia Jones (Aline), De Waal Stemmet (Caio), Rowlen von Gericke (Daniel), Andreas Jordaan (Antonio), Elma Potgieter (Irene), Donovan Petersen (Jonatas), Ilse Klink (Jussara) en Jacky Carpede (Menah, Jonatas se suster).
Plaas van passie is in Mato Grosso do Sul, ’n staat in Brasilië, verfilm en die eerste keer in 2023 uitgesaai. Die reeks bestaan uit 120 uur lange episodes.
Plaas van passie begin op 18 Maart om 20:00 op kykNET&kie (DStv-kanaal 145) en dit sal ook op DStv Stream en Box Office beskikbaar wees.
Koortjies met Elwira
In Maart het Elwira verskeie interessante gaste. Karin Kortjé kom gesels oor die komplikasies van aanneming en vertel hoe sy haar biologiese ma opgespoor het. Karin sing ook haar jongste enkelsnit. Ander gaste in Maart is Hein Andrews en Haroldene Tshienda wat hulle inspirerende stories vertel, en die SA Menseregtekommissie se Chris Nissen en die aktivis Zackie Achmat sluit by Elwira aan om oor menseregte te gesels. Ander musikale gaste in Maart is Warren Hendricks, wat met MS leef, en The Messengers Group.
Koortjies met Elwira is Sondagaande om 19:00 op kykNET&kie (DStv-kanaal 145).