Op Saterdag 22 Maart kan kykers dié gewilde sangeres van nader leer ken wanneer ’n dokumentêre program oor haar lewe en loopbaan op kykNET (DStv-kanaal 144) uitgesaai word.
Demi Lee is in Worcester gebore, maar nadat sy haar pa op ’n jong ouderdom verloor het, het haar ma Kaapstad toe getrek. Sy het in Durbanville grootgeword, en op negejarige ouderdom was dit reeds duidelik dat sy ’n besonderse sangtalent het. In 2014 neem sy aan Idols deel en behaal die sewende plek. Haar eerste enkelsnit, “Liefdes wen resep”, is in 2015 vrygestel en het binne ’n dag die nommereenposisie op iTunes se trefferlys vir Afrikaanse musiek gehaal.
In 2018 neem Demi Lee aan die talentkompetisie Die kontrak deel. Sy was een van net agt sangers wat uit bykans 2 000 inskrywings gekeur is. Ná ’n reeks uitkloprondes en harde werk saam met haar mentor, die sangeres Monique Steyn, is Demi Lee as die wenner aangewys. Sy het ’n platekontrak by Coleske Artists losgeslaan en as deel van haar prys het sy aan Afrikaans is Groot in 2018 deelgeneem.
Van Demi Lee se treffers sluit in “Mis eet slaap herhaal”, “Wie se hart breek jy vanaand” en “Net myne”. By verlede jaar se Aitsa-musiektoekennings het sy drie pryse gewen vir haar liedjie “Hart breek”. Sy het met die louere weggestap in die kategorieë vir beste musiekvideo, popliedjie van die jaar en die meeste stromings deur ’n vroulike kunstenaar.
Haar nuwe album, Klein dingetjies, word op 21 Maart vrygestel.
- Demi Lee Moore: ’n Nuwe era word op Saterdagaand 22 Maart om 20:00 op kykNET (DStv-kanaal 144) uitgesaai en sal ook op DStv Stream en Catch Up beskikbaar wees. Die program is in samewerking met Spotify gemaak en word eksklusief op kykNET uitgesaai.